Rektori i Universitetit të Tiranës, Prof. Dr. Artan Hoxha, priti në një takim zyrtar Ambasadoren e Kanadasë me seli në Itali, Znj. Elissa Golberg, e shoqëruar nga përfaqësues të lartë të Canadian School of Public Service (CSPS): Z. Taki Sarantakis, President; Znj. Jodi Brouillard, Zëvendëspresidente; si dhe Z. Curtis Peters, Këshilltar për Politikën dhe Ekonominë në Ambasadën Kanadeze.

Gjatë takimit u diskutua për mundësitë e vendosjes së marrëdhënieve të bashkëpunimit me universitetet më të mira kanadeze, si dhe për shkëmbimin e përvojave dhe praktikave më të mira në fushën e arsimit dhe formimit të nëpunësve publikë, me theks të veçantë në drejtësi dhe administratë publike.

Përfaqësuesit e CSPS dhe Ambasadorja Golberg shprehën interes për të zhvilluar më tej dialogun me Universitetin e Tiranës, me synimin për të forcuar programet universitare që mbështesin zhvillimin e nëpunësve publikë të aftë dhe me njohuri bashkëkohore.

Në takim ishte e pranishme edhe Dr. Erida Elmazi, Drejtore e Drejtorisë së Kërkimit Shkencor, Projekteve dhe Marrëdhënieve me Jashtë në Universitetin e Tiranës.

Ky takim shënon një hap të rëndësishëm drejt zgjerimit të bashkëpunimit akademik ndërkombëtar dhe krijimit të urave të reja mes Universitetit të Tiranës dhe institucioneve kanadeze të arsimit të lartë.