UNIADRION
UNIADRION është një rrjet ndërkombëtar universitar dhe kërkimor, i krijuar për të forcuar bashkëpunimin akademik dhe shkencor midis vendeve të rajonit të Adriatikut dhe Jonit. Qëllimi i rrjetit është të mbështesë zhvillimin e qëndrueshëm të rajonit përmes arsimit të lartë, shkencës dhe inovacionit, duke krijuar ura bashkëpunimi ndërmjet universiteteve dhe instituteve kërkimore.
Objektivat kryesore
- Promovimi i mobilitetit të studentëve, pedagogëve dhe studiuesve;
- Nxitja e projekteve të përbashkëta kërkimore në fusha me rëndësi për rajonin, si mjedisi, turizmi, zhvillimi kulturor e social, ekonomia blu dhe inovacioni;
- Shkëmbimi i njohurive dhe përvojave akademike;
- Mbështetja e procesit të integrimit evropian të vendeve pjesëmarrëse, në kuadër të Strategjisë së Adriatikut dhe Jonit (EUSAIR).
Përmes aktiviteteve të tij, UNIADRION shërben si një platformë bashkëpunimi e cila forcon lidhjet akademike dhe shkencore, duke kontribuar në zhvillimin afatgjatë dhe të qëndrueshëm të rajonit.
Pjesëmarrja e Universitetit të Tiranës
Universiteti i Tiranës është pjesë aktive e rrjetit UNIADRION dhe kontribuon në projekte të përbashkëta kërkimore, mobilitete studentore dhe akademike, si dhe në nisma që lidhen me zhvillimin e qëndrueshëm të rajonit. UT është gjithashtu anëtar i projektit ESN-Air, një iniciativë që synon të promovojë shkëmbimin e njohurive dhe praktikat më të mira në fushën e edukimit dhe zhvillimit të aftësive digjitale dhe ndërkulturore midis studentëve në rajon.
Përveç kësaj, Universiteti i Tiranës merr pjesë në konsorciumin Erasmus+ të udhëhequr nga UNIADRION, i cili menaxhohet nga Università Politecnica delle Marche (UNIVPM) dhe vepron si koordinatore kryesore e këtij konsorciumi duke mundësuar mobilitet ndërkombëtar të studentëve dhe stafit, zhvillim të projekteve ndëruniversitare dhe fuqizim të partneriteteve akademike në mbarë rajonin Adriatiko-Jonian.
Pjesëmarrja në këto iniciativa i jep UT-së mundësi të thellohet në bashkëpunimin ndërkombëtar, të rrisë kapacitetet e tij akademike dhe të kontribuojë në krijimin e një rrjeti të qëndrueshëm akademik dhe kërkimor.