Ferid Murad,Nobelisti shqiptar, do të mbetet ngaherë model dhe burim frymëzimi për familjen akademike shqiptare.Një personalitet i madh dhe i shquar i shkencës së mjekësisë shqiptare dhe botërore, Prof. Murad është ndarë nga jeta në moshën 87 vjeçare.Ky është një lajm i hidhur për familjen, të afërmit, kolegët, bashkëpunëtorët dhe familjen akademike shqiptare. Ai ishte misionar në botën e mjekësisë dhe shkencës, të cilës i kishte kushtuar jetën.
Fituesi i çmimit Nobel në mjekësi në vitin 1998, Ferid Murad i rreshtoi ngjyrat kuq e zi krah nobelistëve të kombeve të tjera.
Ferid Murad ishte bir i një shqiptari që kishte emigruar në SH.B. A në vitin 1913 dhe e jetoi gjithë jetën e tij duke qenë i lidhur me origjinën e të atit, me rrënjët shqiptare.Vullneti i tij i paepur, talenti i rrallë dhe këmbëngulja e renditën akademikun shqiptar në listën e intelektualëve me më ndikim në shkencën e mjekësisë, duke u finalizuar edhe me akordimin e çmimit Nobel.Jeta dhe karriera e tij janë një burim fymëzimi dhe motivimi për këdo, por në veçanti për familjen e madhe të akademikëve shqiptarë, për studentët e çdo brezi në mjekësi, por jo vetëm.Universiteti i Tiranës, që prej 1999 ka fatin ta ketë këtë akademik mbarëbotëror pjesë të Plejadës së Artë Akademike dekoruar me titullin “Doctor Honoris Causa”.Si Rektor i Universitetit të Tiranës, shpreh dhimbjen për humbjen e kësaj figure të madhe të shkencës botërore dhe të një përfaqësuesi të madh të komunitetit intelektual shqiptar në Shtetet e Bashkuara të Amerikës