Në këtë konferencë të organizuar nga Qendra Kombëtare e Librit dhe Leximit në bashkëpunim me Universitetin e Tiranës, qenë të pranishëm Ministrja e Kulturës, Znj. Elva Margariti, Rektori i UT-së, Prof. Dr. Artan Hoxha, Drejtoresha e QKLL, Alda Bardhyli, Akademik Vasil Tole, Botuesi i veprës së Kadaresë, Z. Bujar Hudhri, shkrimtarë, studiues e profesorë.

Në fjalën e tij përshëndetëse, Rektori i Universitetit të Tiranës, Prof. Dr. Artan Hoxha u shpreh ndër të tjera se: “Në universitetin tonë vepra e Kadaresë është një vizion për sesi universiteti duhet të përsoset, duhet të mendojë, të përçojë angazhim për përmirësimin e cilësisë së jetë dhe emancipimin kulturor.”

Gjithashtu Rektori risolli në vëmendje se “në zemër të panteonit të personaliteteve të mëdha të kulturës, letërsisë, shkencës, politikës, të cilët Universiteti i Tiranës, i ka nderuar me titullin “Doktor Honoris Causa”, si: Orhan Pamuk, Alain Bosquet, Vedat Kokona, Ferid Murat, Romano Prodi, Ibrahim Rugova, Dritëro Agolli, Francesko Altimari, Matteo Mandala, Lucia Nadini, Marie Royce, etj…, është edhe Ismail Kadare, i cili vetvetishëm i jep më shumë shkëlqim këtij panteoni, që na frymëzon me kumte dhe vlera universale mendimi”.