Universiteti i Tiranës është universiteti më i madh dhe njëkohësisht më i vjetër në Republikën e Shqipërisë. Ai veçohet ndër gjithë universitetet e tjera publike dhe jo publike, ofron programe studimi në fushat Shkenca Natyrore, Shkenca Filologjike dhe të Edukimit, Shkenca Humane dhe Shoqërore, Shkenca Ekonomike. Programet organizohen në tre cikle të njëpasnjëshme: cikli i parë; cikli i dytë dhe cikli i tretë.
Gjithashtu, Universiteti i Tiranës veçohet për numrin e programeve të studimit (164 programe në të tre nivelet), larminë (programe në shkencat e natyrës, ekonomi, drejtësi, filologji, gjuhë të huaja dhe shkenca sociale), veçantinë e fakulteteve të specializimit dhe të kualifikimit (pjesa më e madhe e programeve të studimit në Fakultetin e Shkencave të Natyrës, të Gjuhëve të Huaja dhe të Histori dhe Filologjisë, kryesisht në nivelet master dhe doktoraturë).
| Cikli i Studimit | Numri i Programeve |
|---|---|
| Cikli i parë, “Bachelor” | 41 |
| Program i Integruar | 1 |
| Cikli i dytë, Master Profesional | 39 |
| Cikli i dytë, Master i Shkencave | 73 |
| Cikli i tretë, Master Ekzekutiv | 3 |
| Cikli i tretë, Studime në Doktoraturë sipas nënfushave | 7 |
| Totali i programeve të studimit sipas cikleve | 164 |
Për t’iu përgjigjur kërkesave në rritje të tregut të punës dhe zhvillimeve bashkëkohore, Universiteti i Tiranës vijon të zgjerojë ofertën e tij akademike, duke hapur programe të reja studimi në disa fusha me prioritet të lartë.
Këto programe kanë si synim përgatitjen e profesionistëve të kualifikuar dhe të aftë për t’iu përshtatur dinamikave të tregut dhe sfidave të së ardhmes, duke u ofruar studentëve një eksperiencë studimi të përditësuar me standardet më të larta akademike dhe profesionale.
Gjatë vitit akademik 2023 dhe në vazhdim, për ciklin e parë Bachelor, në fushat e studimit të Shkencave të Natyrës, Historisë dhe Filologjisë si dhe të Gjuhëve të Huaja, janë hapur këto programe:
Në fushën e Shkencave të Natyrës, janë hapur programet:
- Bachelor në “Fizikë dhe Shkenca Kompjuterike”
- Bachelor në “Kimi Farmaceutike”
- Bachelor në “Shkenca Natyrore Mjedisore” (Double Degree)
- Bachelor”në “Data Science dhe Inxhinieri Informatike”/”Data Science and Computational”
Në fushën e Historisë dhe Filologjisë, janë hapur programet:
- “Bachelor” në “Studime Ndërkombëtare”
Në fushën e Gjuhëve të Huaja janë hapur programet:
- Bachelor në “Gjuhë Frënge dhe Gjuhë e Shenjave Shqipe”
- Bachelor në “Përkthim dhe Interpretim në Gjuhë Ruse dhe Angleze”
- Bachelor në “Gjuhë dhe Kulturë Frënge dhe Kineze”
Këto programe akademike janë konceptuar për të formuar specialistë me njohuri bashkëkohore, të cilët do të kontribuojnë në zhvillimin shkencor dhe profesional të vendit. Gjithashtu, është realizuar riorganizimi i një sërë programesh si në ciklin e parë, ashtu edhe në ciklin e dytë, me qëllim ofrimin e një standardi që synon ndërkombëtarizimin.
Një nga qëllimet e Universitetit të Tiranës është njohja e tij ndërkombëtare. UT-ja është institucion partner në disa programe bashkëpunimi të Komisionit Europian si: Tempus, Erasmus Mundus Action 2, IPA, më konkretisht: JoinEU-SEE, Basileus, Pacinno, Eureqa, Tempus Interface. Nga projektet e mobilitetit ERASMUS + kanë përfituar të gjitha strukturat e UT-së, studentët, stafi akademik dhe ai administrativ.
UT-ja ka nënshkruar edhe shumë marrëveshje bashkëpunimi me universitete dhe institucione të ndryshme evropiane dhe botërore. Këto marrëveshje kuadër kanë si qëllim shkëmbimin akademik dhe studentor, programe kërkimi të përbashkëta, shkëmbime akademike në botime, revista, organizimin e konferencave të ndryshme etj. Ai gjithashtu është anëtar i shumë rrjeteve të huaja si: UNINOVIS, UNIADRION, EUA, UNICA,MCU,BUA , etj.
ORGANIZIMI I STUDIMEVE NË UNIVERSITETIN E TIRANËS
Studimet universitare
Në përputhje me parashikimet ligjore, format e studimit që ofrohen nga njësitë kryesore të Universitetit të Tiranës, janë:
a) studime me kohë të plotë;
b) studime me kohë të zgjatur;
Organizimi i studimeve universitare me kohë të plotë
Programet e studimit në UT organizohen në tri cikle të njëpasnjëshme:
a) cikli i parë;
b) cikli i dytë;
c) cikli i tretë.
Në fusha të veçanta, Universiteti i Tiranës ofron programe të integruara të studimeve të ciklit të parë dhe të dytë së bashku, të cilat realizohen me jo më pak se 300 kredite dhe zgjatja normale e tyre është jo më pak se pesë vite akademike.
Programet e studimit në ciklin e parë
Programet e studimit të ciklit të parë synojnë të japin njohuri bazë mbi metoda e parime shkencore të përgjithshme dhe aftësi të caktuara në një larmi të gjerë profesionesh e specialitetesh.
- Programet e studimit të ciklit të parë në Universitetin e Tiranës realizohen, si rregull, me 180 kredite europiane (ECTS) dhe kohëzgjatja normale e tyre është 3 vite akademike.
- Studentët në këtë program, mbështetur në kriteret e vendosura në rregulloren e UT-së për notën mesatare, mund të diplomohen me provim të përgjithshëm përfundimtar ose punim diplome.
- Në përfundim të programeve të studimit të ciklit të parë, lëshohet diplomë universitare “Bachelor” në fushën e arsimimit të kryer.
Cikli i parë i Studimeve (me 41 Programe) Lloji i Diplomës Bachelor.
__________________________________________________________________________
Programet e studimit në ciklin e dytë
Programet e studimit në ciklin e dytë mund të organizohen në programe studimi “Master i Shkencave” ose “Master Profesional”, referuar nivelit 7 të Kornizës Shqiptare të Kualifikimeve. Si dhe në programe të Integruar të studimit të cilat realizohen me 300 kredite
__________________________________________________________________________
Programetë integruara të studimeve të ciklit të dytë
Programe të integruar të studimit në ciklin e dytë organizohen me 300 kredite dhe me kohëzgjatje normale respektivisht (5) pesë vite akademiuke. Ky program studimi ofrohet në fushën e Drejtësisë, “Master i Shkencave” në “Drejtësi”
Lloji i Diplomës Master i Shkencave në Drejtësi.
- Programet e studimit të ciklit të dytë në “Master i Shkencave” i pajisin të diplomuarit që zotërojnë diplomën universitare “Bachelor”, me njohuri të thelluara shkencore teorike dhe praktike në drejtimin përkatës.
- Ky program mund të realizohet me 120 kredite me kohëzgjatje normale jo më pak se dy vite akademike. Këtu përfshihen 30-40 kredite për një projekt kërkimor, nën udhëheqje të kualifikuar, i cili përfundon me diplomë (mikrotezë). Në përfundim të programit të studimit të ciklit të dytë, lëshohet diplomë universitare “Master i Shkencave” në fushën e arsimimit të kryer.
- Programi i studimit mund të realizohet edhe si program i integruar i studimit i ciklit të dytë, me 300 kredite dhe me kohëzgjatje normale prej pesë vitesh akademike. Ky program studimi ofrohet në drejtësi, si dhe në fusha të tjera të përcaktuara nga aktet nënligjore. Studimet në këtë program përmbyllen me punim diplome dhe studentët pajisen me diplomë të integruar në fushën e arsimimit të kryer.
- Programet e studimit “Master Profesional” u ofrojnë të diplomuarve me një diplomë të ciklit të parë njohuri me karakter praktik profesional në drejtimin përkatës. Realizohen me 60 ose 120 kredite dhe kohëzgjatja normale e tyre është një vit ose dy vite akademike
- Studentët në këtë program, mbështetur në kriteret e vendosura në rregulloren e fakultetit për notën mesatare, mund të diplomohen me provim të përgjithshëm përfundimtar ose punim diplome.
- Në përfundim të programit të studimit të ciklit të dytë, lëshohet diplomë universitare “Master Profesional” në fushën e arsimimit të kryer.
__________________________________________________________________________
Programi i studimit “Master i Shkencave”
__________________________________________________________________________
Programi i studimit “Master Profesional”
Lloji i Diplomës Master Profesional,
______________________________________________________________________________
Programet e studimit në ciklin e tretë
Programet e studimit në ciklin e tretë të studimeve mund të organizohen në programe studimi “Master Ekzekutiv”, programe specializuese afatgjata, si edhe në programe studimi të doktoratës.
Cikli i tretë i Studimeve, Lloji i diplomës “Master Ekzekutiv”